Fotis vo dr Fägi-Musig

Doo gitts kei Wort z'verliere. Es isch eifach schön gsi!

Mitere Schreckensnochricht sin mir ins Probeweekend gstartet. S'Huus stoht nur no e Joor, was bedütet, mir sin zum zweitletschte Mol in Lungere z'Gascht gsi. S'isch schad, aber wohr. Trotzdäm sin mir vorwärts koh.

Mitere Füehrig zum Thema "StreetArt" sin mir dur Basel gschländeret und hän viel Neus entdeckt.  Usgrüschtet mit allem wos bruucht, hän mir d'Fägikultur lo hoch läbe. E Fotiapparat hets für das nid bruucht, und e so sin am Schluss au keini Foti vo däm grandiose Daag entstande.

In neue Stamm sin mir kurz vor dr Fasnacht züglet. Das het unsere Wirt, dr Marc, in d'Finger gnoh. Im neue Stamm hän mir uns denn au grad troffe und sin wie gwohnt an d Fasnacht gange. Ufem Claraplatz hän mir aber au unser 40-jöörigs Bestoh gfiirt und für das e eigens kreierti Renovations-Urkunde unterschribe. Wär die will bestuune, ka das glyy nach dr Fasnacht im Restaurant Klybeck-Casino mache. Dört wänn mir die nämlig denn ufhängge, sobald mir dr richtigi Rahme drfyyr gfunde hän.

Was isch syt em letschtjöörige Probeweekend passiert? Es Probeweekend! Zwar nid spektakulär, aber nid minder erfrüschend. Schön, das das het dörfe stattfinde.

Trotz sozialer Distanzierig hän mir uns unter agmässene Bedingige das Joor ins Probeweekend begäh, und hän die gschätzti Husvermietig mit unserer Awäseheit unterstützt. Mitem richtige Blosmusig-Probeweekend-Schutzkonzäpt hän mir denn unter dene erschwerte Bedingige könne Probe bis fascht wortwörtlich zum umgheie. Dr Musigchef het us dr Färni die ganzi Gruppe dirigiert und uns dr Wäg zu de richtige Tön gwise. Sin Ersatzmaa het derwyyl an dr Front abeputzt waser het könne. Fondue isch gstriche gsi, dorum het d Gruppe müese en Sicherigschaschte-Raclette-Orientierigslauf bestritte, damit me sich das z'Nacht het dörfe verdiene. Schliesslich hän mir das aber gschafft und es isch ohni Verletzti, Disqualifizierti oder Verloreni über d'Bühni gange.

Und damit mir au joo schön elei sin blibe, het uns dr Fägi-Härde-Schutzhund vom Räscht vo dr Wältbevölkerig abgschirmt und uf uns ufpasst.

Von Odin liess sich die Horde leiten, wildfremde Gewässer zu befahren, im Wettstreit die Besten der Besten unter den Rohlingen zu finden und schliesslich wohlverdient im Fjordwasser zu schwitzen. Möge Thors Zorn euch verfehlen! Es war ein gelungener Tag. Walhalla!

Unterem Motto 'Werner Beinhart' hän mir uns adäquat usgrüschtet zunere 2-tägige Töfftour ufgmacht. Zerscht sin mir dur dr Schwarzwald tuckeret und hän bim schönschte Töffwätter dr König für eusi bald planti Korsikareis userkore. Die ewigi Prömpelmeischterschaft het uns denn au begleitet bis an Rhyy, wo mir uf sinere Mittelinsle zwüsche de zwei grosse Noochbere hän unseri Zält ufgschlage.
S Fescht vom 14. juillet a sym Voroobe in dr nööch glägene Feschtigsstadt Neuf-Brisach hän mir denn, vom userkorene König beuftreit, bsuecht und dr Oobe lo usklinge.
Dr Daag druff, hän mir dr Pnö lo tschäddere für wider heimeszue. Dr allererschti Zweitägerherrebummel isch dodrmit in d'Gschicht ihgange.

Sell no eine drusskoh, was e Kleikind mitem Musketier z'tue het. Aber nichtsdestotrotz hämmer ys zum Esel gmacht, und uns vonere Horde Kinder dur d Fasnacht traage loh. Erschti Impressione gitz doo.

S'disjöhrige Klausekegle het wider im Ruchfäld stattgfunde. Unterem Motto "Dismol gwinnt nid dr Stephan" hän sich alli Beteiligte meh oder minder müeh gäh, dr Pokal heim z'due. Nach dem grosse Gfächt isches denn offiziell worde, und s'Motto het könne bestätigt wärde.

Zum disjöhrige Probeweekend hän mir d Reis gmacht uf Köln und sin dört go luege, wie die musikalischi Unterhaltig um dr 11.11. denn e so usgseht. Sehr positiv überrascht sin mir worde, well e Mänge het möchte dr Fägi hinterhärgwaggle, au zum nur e Bier in dr Baiz go bstelle oder au wider retour in Zug.

Gwohnt hän mir alli zämme und probt hän mir Samschtig und Sunntig wie die Wilde uf de Stroosse und in de Baize. Me findet bi de Föteli es paar Iidrück und Highlights. Aber s'Beschte erfahrsch nadierlig nur am Mittwuch in dr Prob, wo mir vo vorne bis hinde verzelle, was mir erläbt hän.
Kölle Olaf!